Upatikanaji viungo

Breaking News
Ijumaa, Desemba 02, 2022 Local time: 12:50

Biden asema chaguo la Sunak kama Waziri Mkuu mpya wa Uingereza ni 'hatua kubwa mno'


Atakayekuwa Waziri Mkuu wa Uingereza Rishi Sunak.

Rais wa Marekani Joe Biden Jumatatu alitaja chaguo la Rishi Sunak, waziri wa zamani wa fedha, kama waziri mkuu wa kwanza wa Uingereza asiye mzungu, kuwa "la msingi" huku White House ikisema Biden angewasiliana na  kiongozi huyo mpya na kumpongeza.

White House ilisema kuwa Biden alikuwa akifuata itifaki kwa kutompigia simu na kumpongeza rasmi Sunak, ambaye ana asili ya India, na ambaye babake alizaliwa Kenya na mamake Tanganyika, hadi atakapokutana na Mfalme Charles III siku ya Jumanne kupata idhini ya kuunda serikali.

Sunak, alipata uungwaji mkono na wabunge wa Chama cha Conservative, kuwa waziri mkuu mpya wa nchi hiyo, kufuatia kujiuzulu kwa Liz Truss wiki iliyopita, ambaye alikuwa katika afisi hiyo kwa chini ya miezi miwili.

Sunak atakuwa waziri mkuu wa tatu wa Uingereza katika muda wa wiki saba tu, baada ya kipindi cha machafuko ya kisiasa ambayo yameharibu taswira ya kimataifa ya nchi hiyo. Huku mfumuko wa bei ukiwa zaidi ya 10% na uchumi ukitabiriwa kudorora, huenda tafrija ya kisiasa ya Sunak itakuwa fupi.

Sunak alitoa hotuba fupi ya televisheni Jumatatu kutoka makao makuu ya Chama cha Conservative huko London.

"Uingereza ni nchi nzuri mno, lakini hapana shaka tunakabiliwa na changamoto kubwa ya kiuchumi. Sasa tunahitaji utulivu na umoja,” alisema.

"Kitakuwa kipaumbele changu kikubwa kuleta chama chetu na nchi yetu kwa sababu hiyo ndiyo njia pekee ya kushinda changamoto zinazotukabili na kujenga mustakabali bora na wenye mafanikio," aliongeza.

Sunak anatarajiwa kumtembelea Mfalme Charles III Jumanne kukubali mwaliko wa kuunda serikali.

Facebook Forum

XS
SM
MD
LG