Upatikanaji viungo

Breaking News

Miguna aendelea kuzuiliwa katika uwanja wa ndege Nairobi


Miguna Miguna.

Mzozo unaomkabili wakili na mwanaharakati mzaliwa wa Kenya, Miguna Miguna, uliendelea kwa siku ya pili Jumanne baada ya maafisa wa idara ya uhamiaji kumpelekea fomu za maombi ya uraia wa Kenya katika uwanja wa ndege wa Kimataifa wa Jomo Kenyatta, lakini akakataa kuomba uraia huo.

Kwa mujibu wa wakili wake, Cliff Ombeta, Miguna, ambaye amezuiliwa kwenye uwanja huo tangu alipowasili nchini hapo jana, alipelekewa fomu hizo na maafisa wa idara ya uhamiaji, baada ya kukataa kuwasilisha cheti chake cha kusafiria.

Gazeti la Daily Nation limeripoti kwamba kufikia alasiri ya leo saa za Kenya, hatima ya Miguna bado haikuwa ikijulikana na kwamba bado yuko kwenye uwanja wa ndege.

Idara ya uhamiaji ya Kenya inasisitiza kwamba Miguna alipoteza uraia wake mwaka wa 1988 alipochukua uraia wa Canada kwa sababu wakati huo, katiba ya Kenya haikuruhusu uraia pacha.

Jumanne, idara hiyo ilitoa taarifa iliyosema kuwa kwamba ni sharti aombe upya uraia huo kwa mujibu wa sheria. Afisa mwandamizi wa idara hiyo, Joseph Munywoki, alithibitisha kwamba maafisa wake walikuwa wamempelekea Miguna fomu za kuomba uraia.

Vurugu zilizuka Jumatatu usiku pale maafisa wa usalama walipompomlazimisha wakili huyo kuabiri ndege ya shirika la ndege la Emirates, lakini akakataa kusafiri na kusema kuwa hawezi kulazimishwa kufanya hivyo.

Miguna, ambaye amejitangaza kuwa kiongozi wa vuguvugu la National Resistance Movement (NRM- Kenya), amekuwa akiishi uhamishoni tangu maafisa wa polisi walipomlazimisha kuabiri ndege katika uwanja wa kimataifa wa Jomo Kenyatta mjini Nairobi mapema mwezi Februari, kwa madai kwamba yeye si raia wa Kenya.

Mapema mwezi Februari, serikali ya Kenya iliwasilisha hoja mahakamani na kudai kuwa Miguna aliukana rasmi uraia wake na kwa hivyo hastaili kudai kuwa Mkenya.

Lakini mwanasiasa huyo mwenye utata ameshikilia kwamba katiba ya Kenya inaeleza bayana kuwa mtu aliyezaliwa katika nchi hiyo hawezi kupoteza uraia wake.

Sakata hiyo inajiri chini ya wiki tatu baada ya rais wa nchi hiyo Uhuru Kenyatta Kukutana na kiongozi wa upinzani Raila Odinga na kukubaliana kushirikiana pamoja kutafuta uwianio wa kitaifa.

Kabla ya kulazimishwa kwenda uhamishoni, Miguna alikuwa amekamatwa na kuzuiliwa na polisi kwa takriban siku tano kwa tuhuma kwamba alitoa kiapo - kinyume na sheria - kwa kiongozi wa upinzani, Raila Odinga, mbali na kuwa mwanachama wa vuguvugu la NRM lililopigwa marufuku.

Lakini licha ya mahakama moja mjini Nairobi kumtaka afikishwe mbele ya jaji, polisi walimuwasilisha mbele ya hakimu katika mji ulio mbali na mji mkuu wa Kenya, na baadaye wakampeleka moja kwa moja hadi kwenye uwanja wa ndege, na kuwondosha nchini.

Tangu wakati huo, Miguna amekuwa akishiriki mahojiano na vyombo mbalimbali vya habari na kufanya mikutano na Wakenya wanaoishi nje ya nchi, ikiwa ni pamoja na kutembelea miji kadhaa ya Canada, Marekani na Uingereza.

  • 16x9 Image

    BMJ Muriithi

    BMJ Muriithi is an international Broadcaster/ Multimedia specialist with Voice of America (VOA) and is based in Washington DC. He previously worked as a stringer, filing stories from Atlanta, Georgia, as well as the international correspondent for Nation Media Group, Kenya. He is a versatile journalist who has widely covered international affairs, including on-location reports of UN summits in New York and AU deliberations in Addis Ababa, Ethiopia. He also reports on regular day-to-day happenings and human interest stories from around the world.

Facebook Forum

XS
SM
MD
LG