“Hadi itakapotolewa taarifa nyingine, kwa sababu za usalama wa umma, shughuli za vyama vya siasa na shughuli za aina ya kisiasa za mashirika ya kiraia zimesimamishwa nchini kote,” chini ya amri iliyotolewa na kiongozi wa kijeshi Kanali Assimi Goita, msemaji wa serikali alisema.
Amri hiyo imetolewa baada ya zaidi ya vyama 80 vya siasa na makundi ya kiraia kutoa taarifa ya pamoja tarehe 1 Aprili, wakiomba uchaguzi wa rais ufanyike “haraka iwezekanavyo” na kumalizika kwa utawala wa kijeshi.
Taifa hilo la Afrika magharibi limeongozwa na wanajeshi tangu mapinduzi ya mfululizo mwaka 2020 na 2021, huku hali ya usalama pamoja na mzozo wa kisiasa na kibinadamu ikizidi kuwa mbaya.
Mwezi Juni 2022, utawala wa kijeshi ulisema uchaguzi wa rais ungefanyika mwezi Februari na utawala kukabidhiwa kwa raia tarehe 26 Machi. Lakini uchaguzi uliahirishwa na uongozi wa kijeshi haukutangaza tarehe nyingine.
Msemaji wa serikali Kanali Abdoulaye Maiga amefafanua kusimamishwa kwa shughuli za vyama kwamba ni kutokana na “majadiliano yaliyokwama” wakati wa jitihada za mjadala wa kitaifa mwaka huu.
Sauti za upinzani zimenyamanzishwa kwa kiasi kikubwa chini ya utawala wa kijeshi.
Forum