Siku ya Kimataifa ya Wanawake imeadhimishwa leo Machi 8. Maelfu ya sherehe zimefanyika kote duniani kuelezea mafanikio ya wanawake katika maswala ya kiuchumi, kisiasa na kijamii.
Siku ya leo hutoa nafasi kwa wanawake kutoa mwito wa usawa ili wanawake na familia zao waweze kuishi maisha yenye ufanisi.
Mashirika mbalimbali kote duniani huchagua kauli mbiu zao kulingana na mazingira wanayoishi wanawake, wanapoadhimisha siku hii ya Kimataifa ya Wanawake.
Huko barani Afrika siku hii imeadhimishwa kwa sherehe mbali mbali.
Akizungumza na Sauti ya Amerika kutoka Mombasa, mwenyekiti wa shirika la Maendeleo ya wanawake Kaunti ya Mombasa Bi. Afia Rama alisema licha ya mafanikio mengi waliopata, wanawake wengi bado wanakabiliwa na manyanyaso ya kinyumbani na ukosefu wa usawa katika sekta ya ajira.
Na huko Tanzania mwenyekiti wa muungano wa shirika la ‘Utepe Mweupe’ Bi. Rose Mlay aliiambia Sauti ya Amerika kuwa wanawake wengi bado wanakabiliwa na changamoto katika maswala ya uzazi salama. Alisema wengi hawana uwezo wa kupata huduma bora za afya kwao binafsi na kwa watoto wao wanapokuwa wajawazito na hata baada ya kujifungua.
Naye mke wa rais wa Kenya Bi.Margaret Kenyatta ameiadhimisha siku ya Kimataifa ya Wanawake kwa kutimka mbio katika uwanja wa michezo wa Nyayo Stadium kuchangia mradi wake wa ‘Beyond Zero’ unaolenga kusaidia wanawake wa Kenya kujifungua salama.
Juhudi zake zimefanikiwa kuchanga shilingi za Kenya milioni 46.
Siku ya Kimataifa ya Wanawake iliadhimishwa mwanzo mwaka wa 1911.