Upatikanaji viungo

Breaking News
Ijumaa, Septemba 30, 2022 Local time: 09:58

Mwanajeshi wa Umoja wa mataifa auawa nchini Mali


Wanajeshi wa Senegal wa tume ya Umoja wa mataifa ya kulinda amani nchini Mali MINUSMA, July 24, 2019. Picha ya AFP

Mwanajeshi mmoja mlinda amani wa Umoja wa mataifa ameuawa na wengine watatu kujeruhiwa Jumatano katika shambulio la kigaidi dhidi ya msafara wao katika jimbo la Kidal, kaskazini mwa Mali, tume ya Umoja wa mataifa nchini humo MINUSMA imesema.

Mwanajeshi huyo aliyeuawa na majeruhi wote ni kutoka kikosi cha Jordan, afisa mmoja wa usalama amesema kwa masharti ya kutotajwa jina.

Msafara huo ulishambuliwa kwa silaha ndogo ndogo na maguruneti ya roketi katika shambulio lililodumu karibu saa moja, msemaji wa MINUSMA Olivier Salgado aliandika kwenye Twitter.

“Kwa bahati mbaya, mmoja wa wanajeshi hao wa Umoja wa mataifa alifariki kutokana na majeraha aliyopata kufuatia shambulio hilo,” Salgado amesema.

Hakuna maelezo yaliyotolewa kuhusu wanaoshukiwa kufanya shambulio hilo.

Katika taarifa, mwakilishi maalum wa Umoja wa mataifa nchini Mali na mkuu wa MINUSMA, El Ghassim Wane, amesema walinda amani hao waliwazuia washambuliaji ambao waliokuwa na silaha nzito.

“Ninalaani vikali shambulio hili, ambalo ni jaribio jingine la kukata tamaa la makundi ya kigaidi kukwamisha harakati za kutafuta amani nchini Mali na utekelezaji wa mamlaka ya MINUSMA,” amesema.

Shambulio hilo ni tukio la tano kutokea katika jimbo la Kidal katika kipindi cha wiki moja, taarifa ya MINUSMA imesema.

Facebook Forum

XS
SM
MD
LG