Mfanyakazi wa zamani wa Twitter adai kuwa kampuni hiyo inatishia faragha ya wateja wake

24 Agosti, 2022

Nembo ya kampuni ya Twitter yaonekana nje ya makao makuu ya kampuni hiyo mjini Francisco, California. Picha ya Reuters

Mkuu wa usalama kwenye kampuni ya Twitter aliyefutwa kazi hivi karibuni anadai kuwa mtandao huo wa kijamii unatishia faragha kwa wateja wake milioni 238 wa kila siku, ikiwemo mashirika na maafisa wa serikali, jambo linalohusiana na usalama wa taifa.

Madai hayo yalitolewa na Peiter “Mudge” Zatko, mdukuzi wa kompyuta ambaye alikuwa ameajiriwa na mkurugenzi mtendaji wa zamani wa Twitter Jack Dorsey.

Kituo cha televisheni, CNN na gazeti la Washington Post zimeripoti kwanza maelezo ya malalamiko hayo Jumanne.

Waraka wa malalamiko hayo uliorekebishwa wenye kurasa 84 uliwasilishwa kwa Bunge la Marekani.

Msemaji wa Twitter ambaye ameomba jina lake lihifadhiwe amesema katika taarifa kwa VOA kwamba “Madai ya Zatko hayana msingi na yana lengo la kuihujumu Twitter, wateja wake na wanahisa wake.”

Habari hizo zilizofichuliwa zinajiri huku Twitter ikijikuta kwenye mpambano wa kisheria na mkurugenzi wa kampuni ya Tesla Elon Musk, anayechukuliwa kama tajiri mkubwa duniani.

Musk alijiondoa kwenye makubaliano ya kuinunua Twitter mwezi uliopita kwa kitita cha dola bilioni 44, akiishtumu Twitter kuficha habari kuhusu idadi ya akaunti zake za kiotomatiki, zinazojulikana kama roboti.

Upatikanaji viungo

Tufuate

Mfanyakazi wa zamani wa Twitter adai kuwa kampuni hiyo inatishia faragha ya wateja wake