Wasanii 13 waimbaji wa mitindo ya taarabu kutoka bendi ya “Five star’s modern taarab” waliokufa kwenye ajali ya gari , wanatarajiwa kuzikwa jijini Dar es salaam baada ya miili yao kusafirishwa kutoka mkoani Morogoro ilikotokea ajali hiyo kuelekea Dar es salaam.
Ajali hiyo ilitokea jumatatu majira ya saa mbili usiku huko Mikumi mkoani Morogoro.
Rais wa bendi hiyo ya Five star’s modern taarab bwana Ali Juma alinusurika katika ajali hiyo, anasema kundi lake lilikuwa linatoka katika ziara ya kimuziki kwenye mikoa ya nyanda za juu.
Bwana Juma amesema dereva wa gari lao aina ya Costa alikuwa mwendo kasi na ghafla aliona gari kubwa aina ya lori mbele yake likiwa limeegeshwa ndipo aliposhindwa kufunga breki na kuligonga gari hilo kwa nyuma.
Aidha amesema watu 12 walikufa papo hapo na mwingine mmoja alifia hospitali. Amesema kundi lake limepoteza vyombo muhimu, ndugu, na marafiki, pigo ambalo haliwezi kusahaulika.
Wakati huo huo kamanda wa polisi mkoani Morogoro bi Adolphina Chialo alithibitisha kutokea kwa ajali hiyo.
